ਇਸ਼ਕ ਦਾ ਖ਼ੂਨੀ ਖੇਡ: ਸਿਰ 'ਤੇ ਸਿਹਰਾ ਸਜਣ ਤੋਂ ਪਹਿਲਾਂ ਲਾੜੇ ਦਾ ਕਤਲ, ਸਾਜ਼ਿਸ਼ਘੜਨ ਵਾਲੀ ਮੰਗੇਤਰ ਤੇ ਉਸ ਦਾ ਜੀਜਾ ਗ੍ਰਿਫ਼ਤਾਰ

ਝਾਰਖੰਡ ਦੇ ਗਿਰੀਡੀਹ ਜ਼ਿਲ੍ਹੇ ਵਿੱਚ ਰਿਸ਼ਤਿਆਂ ਨੂੰ ਤਾਰ-ਤਾਰ ਕਰਨ ਵਾਲੀ ਇੱਕ ਬੇਹੱਦ ਖ਼ੌਫ਼ਨਾਕ ਵਾਰਦਾਤ ਸਾਹਮਣੇ ਆਈ ਹੈ, ਜਿਸ ਨੇ ਹਰ ਕਿਸੇ ਦੇ ਰੂਂਗਟੇ ਖੜ੍ਹੇ ਕਰ ਦਿੱਤੇ ਹਨ। ਇੱਥੇ ਇੱਕ ਕੁੜੀ ਨੇ ਆਪਣੇ ਨਜਾਇਜ਼ ਪ੍ਰੇਮ ਸਬੰਧਾਂ ਵਿੱਚ ਰੁਕਾਵਟ ਬਣ ਰਹੇ ਆਪਣੇ ਹੀ ਹੋਣ ਵਾਲੇ ਪਤੀ ਨੂੰ ਵਿਆਹ ਤੋਂ ਮਹਿਜ਼ 3 ਦਿਨ ਪਹਿਲਾਂ ਹਮੇਸ਼ਾ ਲਈ ਰਸਤੇ ਵਿੱਚੋਂ ਹਟਾ ਦਿੱਤਾ। ਹੈਰਾਨੀ ਦੀ ਗੱਲ ਇਹ ਹੈ ਕਿ ਇਸ ਖ਼ੂਨੀ ਸਾਜ਼ਿਸ਼ ਵਿੱਚ ਕੁੜੀ ਦਾ ਸਾਥ ਕਿਸੇ ਹੋਰ ਨੇ ਨਹੀਂ, ਸਗੋਂ ਉਸ ਦੇ ਆਪਣੇ ਸਕੇ ਜੀਜੇ ਨੇ ਦਿੱਤਾ। ਪੁਲਿਸ ਨੇ ਤਕਨੀਕੀ ਜਾਂਚ ਦੇ ਸਹਾਰੇ ਇਸ ਅੰਨ੍ਹੇ ਕਤਲ ਕਾਂਡ ਦੀ ਗੁੱਥੀ ਸੁਲਝਾਉਂਦਿਆਂ ਦੋਵਾਂ ਮੁੱਖ ਮੁਲਜ਼ਮਾਂ ਨੂੰ ਸਲਾਖਾਂ ਪਿੱਛੇ ਧੱਕ ਦਿੱਤਾ ਹੈ।

ਘਟਨਾ ਦੀ ਸ਼ੁਰੂਆਤ ਲੰਘੀ 5 ਜੁਲਾਈ ਨੂੰ ਹੋਈ, ਜਦੋਂ ਜਮੁਆ ਥਾਣਾ ਖੇਤਰ ਦੇ ਪਿੰਡ ਭੀਖੋਡੀਹ ਦਾ ਰਹਿਣ ਵਾਲਾ 20 ਸਾਲਾ ਗੱਭਰੂ ਨੀਰਜ ਹਾਜ਼ਰਾ ਸ਼ੱਕੀ ਹਾਲਾਤ ਵਿੱਚ ਲਾਪਤਾ ਹੋ ਗਿਆ। ਪਰਿਵਾਰ ਨੇ ਉਸ ਦੀ ਕਾਫ਼ੀ ਭਾਲ ਕੀਤੀ, ਪਰ ਕੁਝ ਪਤਾ ਨਾ ਲੱਗਣ 'ਤੇ ਪਿਤਾ ਸੁਭਾਸ਼ ਹਾਜ਼ਰਾ ਨੇ ਪੁਲਿਸ ਕੋਲ ਗੁੰਮਸ਼ੁਦਗੀ ਦੀ ਸ਼ਿਕਾਇਤ ਦਰਜ ਕਰਵਾਈ। ਪਰਿਵਾਰ ਵੱਲੋਂ ਅਗਵਾ ਦਾ ਸ਼ੱਕ ਜਤਾਏ ਜਾਣ ਤੋਂ ਬਾਅਦ 8 ਜੁਲਾਈ ਨੂੰ ਪੁਲਿਸ ਨੇ ਅਗਵਾ ਦਾ ਮੁਕੱਦਮਾ ਦਰਜ ਕਰਕੇ ਪੜਤਾਲ ਲਈ ਇੱਕ ਵਿਸ਼ੇਸ਼ ਜਾਂਚ ਟੀਮ (SIT) ਦਾ ਗਠਨ ਕੀਤਾ। ਐੱਸ.ਆਈ.ਟੀ. ਨੇ ਜਦੋਂ ਨੀਰਜ ਦੇ ਮੋਬਾਈਲ ਦੀ ਕਾਲ ਡੀਟੇਲਜ਼ ਅਤੇ ਲੋਕੇਸ਼ਨ ਖੰਗਾਲੀ, ਤਾਂ ਤਾਰ ਗੁਆਂਢੀ ਰਾਜ ਬਿਹਾਰ ਨਾਲ ਜੁੜੇ। ਪੁਲਿਸ ਟੀਮ ਨੇ ਬਿਹਾਰ ਦੇ ਜਮੁਈ ਜ਼ਿਲ੍ਹੇ ਦੇ ਬੇਲਾ ਜੰਗਲ ਵਿੱਚੋਂ ਇੱਕ ਅਣਪਛਾਤੀ ਲਾਸ਼ ਬਰਾਮਦ ਕੀਤੀ, ਜਿਸ ਦੀ ਪਛਾਣ ਨੀਰਜ ਵਜੋਂ ਹੋਣ ਤੋਂ ਬਾਅਦ ਪੁਲਿਸ ਨੇ ਇਸ ਮਾਮਲੇ ਨੂੰ ਕਤਲ ਦੀ ਜਾਂਚ ਵਿੱਚ ਤਬਦੀਲ ਕਰ ਦਿੱਤਾ।

ਪੁਲਿਸ ਪੁੱਛਗਿੱਛ ਦੌਰਾਨ ਜੋ ਸੱਚਾਈ ਸਾਹਮਣੇ ਆਈ, ਉਹ ਕਿਸੇ ਦੇ ਵੀ ਹੋਸ਼ ਉਡਾਉਣ ਲਈ ਕਾਫ਼ੀ ਹੈ। ਜਾਂਚ ਮੁਤਾਬਕ, ਮੁਲਜ਼ਮ ਕੁੜੀ ਉਰਮਿਲਾ ਕੁਮਾਰੀ (ਵਾਸੀ ਪਿੰਡ ਗਮਤਾਰੀਆ) ਦੇ ਆਪਣੇ ਜੀਜੇ ਸੁਭਾਸ਼ ਪਾਸਵਾਨ ਨਾਲ ਲੰਬੇ ਸਮੇਂ ਤੋਂ ਪ੍ਰੇਮ ਸਬੰਧ ਚੱਲ ਰਹੇ ਸਨ। ਇਸੇ ਦੌਰਾਨ ਪਰਿਵਾਰ ਨੇ ਉਰਮਿਲਾ ਦਾ ਵਿਆਹ ਨੀਰਜ ਨਾਲ ਪੱਕਾ ਕਰ ਦਿੱਤਾ। ਦੋਵੇਂ ਪ੍ਰੇਮੀ ਇਸ ਵਿਆਹ ਦੇ ਖ਼ਿਲਾਫ਼ ਸਨ। ਉਨ੍ਹਾਂ ਨੂੰ ਲੱਗਿਆ ਕਿ ਜੇਕਰ ਇਹ ਵਿਆਹ ਹੋ ਗਿਆ ਤਾਂ ਉਨ੍ਹਾਂ ਦਾ ਰਿਸ਼ਤਾ ਟੁੱਟ ਜਾਵੇਗਾ। ਇਸੇ ਡਰ ਕਾਰਨ ਦੋਵਾਂ ਨੇ ਮਿਲ ਕੇ ਨੀਰਜ ਨੂੰ ਹੀ ਖ਼ਤਮ ਕਰਨ ਦਾ ਫ਼ਿਲਮੀ ਪਲਾਨ ਤਿਆਰ ਕਰ ਲਿਆ।

ਸਾਜ਼ਿਸ਼ ਤਹਿਤ ਉਰਮਿਲਾ ਨੇ ਨੀਰਜ ਨੂੰ ਮਿਲਣ ਦੇ ਬਹਾਨੇ ਇੱਕ ਸੁੰਨਸਾਨ ਜਗ੍ਹਾ 'ਤੇ ਬੁਲਾਇਆ, ਜਿੱਥੇ ਉਸ ਦਾ ਜੀਜਾ ਸੁਭਾਸ਼ ਪਹਿਲਾਂ ਹੀ ਘਾਤ ਲਾ ਕੇ ਬੈਠਾ ਸੀ। ਨੀਰਜ ਦੇ ਉੱਥੇ ਪਹੁੰਚਦਿਆਂ ਹੀ ਦੋਵਾਂ ਨੇ ਉਸ 'ਤੇ ਚਾਕੂਆਂ ਨਾਲ ਤਾਬੜਤੋੜ ਹਮਲਾ ਕਰਕੇ ਉਸ ਦਾ ਕਤਲ ਕਰ ਦਿੱਤਾ। ਸਬੂਤ ਮਿਟਾਉਣ ਅਤੇ ਪਛਾਣ ਛੁਪਾਉਣ ਲਈ ਉਨ੍ਹਾਂ ਨੇ ਲਾਸ਼ ਨੂੰ ਬਿਹਾਰ ਦੇ ਜੰਗਲ ਵਿੱਚ ਸੁੱਟ ਦਿੱਤਾ ਅਤੇ ਫ਼ਰਾਰ ਹੋ ਗਏ।

ਐੱਸ.ਡੀ.ਪੀ.ਓ. ਅਮਰੇਂਦਰ ਕੁਮਾਰ ਨੇ ਦੱਸਿਆ ਕਿ ਪੁਲਿਸ ਨੇ ਮੁਸਤੈਦੀ ਦਿਖਾਉਂਦੇ ਹੋਏ ਦੋਵਾਂ ਮੁੱਖ ਮੁਲਜ਼ਮਾਂ—ਉਰਮਿਲਾ ਕੁਮਾਰੀ ਅਤੇ ਸੁਭਾਸ਼ ਪਾਸਵਾਨ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ। ਮੁਲਜ਼ਮਾਂ ਦੀ ਨਿਸ਼ਾਨਦੇਹੀ 'ਤੇ ਵਾਰਦਾਤ ਵਿੱਚ ਵਰਤਿਆ ਗਿਆ ਹੌਂਡਾ ਸਕੂਟਰ (JH-11AS-0312) ਅਤੇ ਕਤਲ ਲਈ ਵਰਤੇ ਗਏ ਦੋ ਤਿੱਖੇ ਚਾਕੂ ਵੀ ਬਰਾਮਦ ਕਰ ਲਏ ਗਏ ਹਨ। ਪੁਲਿਸ ਅਨੁਸਾਰ ਇਸ ਵਾਰਦਾਤ ਵਿੱਚ ਕੁਝ ਹੋਰ ਲੋਕਾਂ ਦੇ ਸ਼ਾਮਲ ਹੋਣ ਦਾ ਵੀ ਸ਼ੱਕ ਹੈ, ਜਿਨ੍ਹਾਂ ਦੀ ਗ੍ਰਿਫ਼ਤਾਰੀ ਲਈ ਝਾਰਖੰਡ ਅਤੇ ਬਿਹਾਰ ਵਿੱਚ ਛਾਪੇਮਾਰੀ ਕੀਤੀ ਜਾ ਰਹੀ ਹੈ।